Pravasi Varthakal

യുഎഇയിലെ സ്വകാര്യ മേഖലയിൽ എമിറേറ്റികൾ പ്രധാനമായും എട്ട് പ്രധാന തൊഴിൽ മേഖലകളിലാണ് ജോലി ചെയ്യുന്നതെന്ന് മാനവ വിഭവശേഷി, എമിറേറ്റൈസേഷൻ മന്ത്രാലയം പുറത്തുവിട്ട റിപ്പോർട്ടിൽ പറയുന്നു. യുഎഇയിലെ ഈ എട്ട് മേഖലകളിൽ സ്വദേശികളുടെ എണ്ണം കൂടുതലായി കാണിക്കുന്നു. എമിറാത്തികൾക്കിടയിൽ ഏറ്റവും കൂടുതൽ ഡിമാന്റുള്ള ജോലികൾ ഏതെല്ലാം ആണെന്ന് പരിശോധിക്കാം.

സ്വകാര്യ മേഖലയിലെ ക്ലറിക്കൽ ജോലികൾ ആണ് ഒന്നാമതായി നിൽക്കുന്നത്. ആകെ തൊഴിലിന്റെ 35.6% വരുന്നത് ഈ മേഖലയിൽ നിന്നാണ്. 2023 മുതൽ 2024 വരെ കണക്കുകൾ പരിശോധിക്കുമ്പോൾ ഈ വിഭാഗം തന്നെയാണ് മുന്നിൽ നിൽക്കുന്നത്. രണ്ടാം സ്ഥാനത്ത് നിൽക്കുന്നത് ശാസ്ത്ര, സാങ്കേതിക, മാനുഷിക മേഖലകളിലെ സാങ്കേതിക വിദഗ്ധർ ആണ്. 22.6% എന്ന നിരക്കിൽ ഈ മേഖലയിൽ ആളുകൾ ജോലി ചെയ്യുന്നുണ്ട്. മുൻ വർഷത്തേക്കാൾ 6.6% വർദ്ധനവ് ആണ് ഈ മേഖലയിൽ ഈ വർഷം കാണിക്കുന്നത്. മൂന്നാം സ്ഥാനത്ത് നിൽക്കുന്നത് സേവന, വിൽപ്പന തൊഴിലുകൾ ആണ്. 18% എമിറാത്തികൾ ഈ മേഖലയിൽ ജോലി ചെയ്യുന്നു. 2023 ൽ നാലാം സ്ഥാനത്തായിരുന്ന ഈ തൊഴിൽ 5% വർദ്ധനവ് രേഖപ്പെടുത്തി ഈ വർഷം മൂന്നാം സ്ഥാനത്ത് എത്തിയിട്ടുണ്ട്. നാലാം സ്ഥാനം പിടിച്ചിരിക്കുന്നത് ശാസ്ത്ര, സാങ്കേതിക, മേഖലകളിലെ സ്പെഷ്യലിസ്റ്റുകൾ ആണ് . നിയമസഭാംഗങ്ങൾ, മാനേജർമാർ, ബിസിനസ് ഡയറക്ടർമാർ എന്നിവർ ആണ് അടുത്ത സ്ഥാനം കരസ്ഥമാക്കിയിരിക്കുന്നത്. കരകൗശല വിദഗ്ധർ, വ്യവസായങ്ങളിലെ തൊഴിലാളികൾ, കൃഷി, മത്സ്യബന്ധനം, മെഷീൻ ഓപ്പറേറ്റർമാർ, അസംബ്ലർമാർ തുടങ്ങിയ വിഭാഗങ്ങൾ എല്ലാം മറ്റു സ്ഥാനങ്ങൾ യഥാക്രമം സ്വന്തമാക്കി.എമറാത്തികളെ സ്വകാര്യ മേഖലയിലെ തൊഴിലുകളിലേക്ക് ആകർഷിക്കാൻ വേണ്ടി എമിറേറ്റൈസേഷൻ ഒരുപാട് സഹയിച്ചിട്ടുണ്ട്. യുഎഇയുടെ സാമ്പത്തിക വളർച്ചയ്ക്കും ആഗോള മത്സരക്ഷമതയ്ക്കും സംഭാവന നൽകാൻ കഴിവുള്ള യോഗ്യതയുള്ള പ്രൊഫഷണലുകളുടെ ഒരു തലമുറയെ സൃഷ്ട്ടിക്കുക എന്നതാണ് യുഎഇ തൊഴിൽ മന്ത്രാലയം ഇതിലൂടെ ലക്ഷ്യം വെക്കുന്നത്. സ്വകാര്യ മേഖലയിലെ സ്വദേശിവല്‍ക്കരണം ശക്തിപ്പെടുത്തുന്നതിനായി ആവിഷ്‌ക്കരിച്ച പദ്ധതിയായ നഫീസ് പ്രോഗ്രാം ഇതിന് വേണ്ടി ഒരുപാട് സഹായിച്ചിട്ടുണ്ട്.നഫീസ് എമിറേറ്റികൾക്ക് സാമ്പത്തിക സഹായം, തൊഴിൽ പരിശീലനം, വികസന പരിപാടികൾ എന്നിവ സംഘടിപ്പിച്ചു. സ്വകാര്യ മേഖലയിലെ റോളുകളെ കുറിച്ച് അവർക്ക് പറഞ്ഞു കൊടുത്തു. സമ്പദ്‌വ്യവസ്ഥയുടെ ഒരു മൂലക്കല്ലായി സ്വകാര്യ മേഖലയെ ശക്തിപ്പെടുത്തുന്നതിനുള്ള വിശാലമായ ദേശീയ തന്ത്രത്തിന്റെ ഭാഗമാണ് ഈ ശ്രമങ്ങൾ. തുടർന്ന്
ദേശീയ പ്രതിഭകളെ വികസിപ്പിക്കുന്നതിനും, തൊഴിൽ സാഹചര്യങ്ങൾ മെച്ചപ്പെടുത്തുന്നതിനും, തൊഴിൽ വിപണിയിലെ ചലനാത്മകത വർദ്ധിപ്പിക്കുന്നതിനുമുള്ള നയങ്ങൾ മന്ത്രാലയം നടപ്പിലാക്കി. യുഎഇയുടെ സാമ്പത്തിക പ്രതിരോധശേഷി ശക്തിപ്പെടുത്തുന്നതിനൊപ്പം പൗരന്മാരെയും അന്താരാഷ്ട്ര പ്രതിഭകളെയും ആകർഷിക്കുന്ന ശക്തമായ ഒരു തൊഴിൽ ആവാസവ്യവസ്ഥ ഉറപ്പാക്കുക എന്നത് തന്നെയായിരുന്നു യുഎഇ ലക്ഷ്യം വെക്കുന്നത്.അന്താരാഷ്ട്ര തൊഴിൽ സംഘടനയുടെ മാനദണ്ഡങ്ങൾക്കനുസൃതമായി യുഎഇയിലെ തൊഴിലാളികളെ ഒമ്പത് തലങ്ങളായി തരംതിരിച്ചിരിക്കുന്നു. സീനിയർ മാനേജ്‌മെന്റ് റോളുകൾ മുതൽ പ്രാഥമിക തൊഴിലുകൾ വരെ ഇവയിൽ ഉൾപ്പെടുന്നു . പൊതു-സ്വകാര്യ സഹകരണത്തിലൂടെയും തന്ത്രപരമായ പരിപാടികളിലൂടെയും ഇപ്പോഴും യുഎഇ എമിറാറ്റികളെ ശാക്തീകരിക്കുന്നത് തുടരുന്നുണ്ട്. ഭാവിയിലേക്ക് മുതൽ കൂട്ടാകുന്ന രീതിയിൽ ആണ് യുഎഇയിൽ തൊഴിൽ വിപണിയെ ശക്തിപ്പെടുത്തുന്നത്.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/EvsyvV3gKrEHNC3r1sci6g