ഖത്തറില്‍ സോഷ്യല്‍ മീഡിയയിലൂടെ പരസ്യം നല്‍കി അനധികൃതമായി സൗന്ദര്യ ചികിത്സ നടത്തി; രണ്ട് പ്രവാസികള്‍ പിടിയില്‍; നാടുകടത്തും
ദോഹ: ഖത്തറില്‍ ആവശ്യമായ പ്രൊഫഷണല്‍ ലൈസന്‍സുകളില്ലാതെ കോസ്മെറ്റിക് ചികിത്സ നടത്തിയ രണ്ട് പ്രവാസികളെ പിടികൂടിയതായി പൊതുജനാരോഗ്യ മന്ത്രാലയം അറിയിച്ചു. സോഷ്യല്‍ മീഡിയ പ്ലാറ്റ്ഫോമുകളില്‍ നല്‍കിയ പരസ്യങ്ങളിലൂടെയാണ് നിയമലംഘകരെ തിരിച്ചറിഞ്ഞതെന്നും മന്ത്രാലയം വ്യക്തമാക്കി. പിടികൂടിയവര്‍ക്കെതിരെ നിയമനടപടി സ്വീകരിച്ചു. ഇവരെ ഖത്തറില്‍ നിന്ന് നാടുകടത്തുമെന്നും മന്ത്രാലയം അറിയിച്ചു. രാജ്യത്ത് വീണ്ടും പ്രവേശിക്കുന്നത് ഈ വ്യക്തികളെ വിലക്കും. വിലക്കുള്ള വ്യക്തികളുടെ പട്ടികയില്‍ ഇവരുടെ പേരുകള്‍ ഉള്‍പ്പെടുത്താനും ബന്ധപ്പെട്ട അധികാരികള്‍ക്ക് ഇവരെ റഫര്‍ ചെയ്തിട്ടുണ്ട്.
പൊതുജനങ്ങളുടെ ആരോഗ്യവും സുരക്ഷയും സംരക്ഷിക്കുന്നതിനും, ലൈസന്‍സുള്ള ആരോഗ്യ സംരക്ഷണ കേന്ദ്രങ്ങളില്‍ ലൈസന്‍സുള്ള ആരോഗ്യ സംരക്ഷണ പ്രാക്ടീഷണര്‍മാര്‍ നല്‍കുന്ന ആരോഗ്യ സേവനങ്ങള്‍ സുരക്ഷിതവും അംഗീകൃതവുമാണെന്ന് ഉറപ്പാക്കുന്നതിനുമുള്ള മന്ത്രാലയത്തിന്റെ നിരന്തരമായ പ്രതിബദ്ധതയുടെ ഭാഗമാണ് നടപടി.
രാജ്യത്തെ ഔദ്യോഗിക അധികാരികളില്‍ നിന്നുള്ള നിയമസാധുതയും അംഗീകാരവും പരിശോധിക്കാതെ സോഷ്യല്‍ മീഡിയ വഴി പ്രചരിപ്പിക്കുന്ന പരസ്യങ്ങളോ രീതികളോ കണ്ട് വഞ്ചിക്കപ്പെടരുതെന്നും ലൈസന്‍സുള്ള ആരോഗ്യ സംരക്ഷണ കേന്ദ്രങ്ങളില്‍ നിന്ന് മാത്രമേ ആരോഗ്യ സേവനങ്ങള്‍ ലഭിക്കുന്നു എന്നത് ഉറപ്പാക്കണമെന്നും മന്ത്രാലയം പൊതുജനങ്ങളോട് അഭ്യര്‍ത്ഥിച്ചു.
രാജ്യത്തെ ഏതൊരു ലൈസന്‍സുള്ള ഡോക്ടറേയും അവരുടെ ലൈസന്‍സ് സ്റ്റാറ്റസ് https://dhp.moph.gov.qa/ ഈ ലിങ്ക് വഴി ‘രജിസ്റ്റേര്‍ഡ് ഹെല്‍ത്ത് കെയര്‍ പ്രാക്ടീഷണറെ കണ്ടെത്തുക’ എന്ന സേവനത്തിലൂടെ പരിശോധിക്കാന്‍ എല്ലാവര്‍ക്കും കഴിയും. ലൈസന്‍സില്ലാത്ത ഏതൊരു ആരോഗ്യ സംരക്ഷണ രീതികളും നിങ്ങള്‍ കണ്ടെത്തിയാല്‍ ghcc@moph.gov.qa എന്ന ഇമെയില്‍ വിലാസത്തില്‍ റിപ്പോര്‍ട്ട് ചെയ്യാവുന്നതാണ്.
ഖത്തറിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ
https://chat.whatsapp.com/EvxvzY3altYB4XZDZIvJjA
Comments (0)