Pravasi Varthakal

മനുഷ്യൻ മറ്റൊരു ഗ്രഹത്തിൽ, പ്രത്യേകിച്ച് ചൊവ്വയിൽ താമസിക്കാൻ തുടങ്ങിയാൽ എന്ത് സംഭവിക്കും? ചൊവ്വയിൽ താമസമാക്കുന്നതിനെക്കുറിച്ച് ഇപ്പോൾ വലിയ ചർച്ചകളില്ലെങ്കിലും, ഭാവിയിൽ അങ്ങനെയൊരു സാധ്യത അതിവിദൂരമല്ല. ഭൂമിയുടെ സാഹചര്യങ്ങളാണു മനുഷ്യനെ പരുവപ്പെടുത്തിയെടുത്തത്. ഗുരുത്വബലം, താപനില തുടങ്ങിയവയൊക്കെ മനുഷ്യശരീരത്തെ രൂപീകരിക്കുന്നതിൽ വലിയ സംഭാവനകൾ നൽകിയ ഘടകങ്ങളാണ്. ചുരുക്കത്തിൽ പറഞ്ഞാൽ ഈ ഭൂമിയുടെ സാഹചര്യങ്ങൾക്കനുസരിച്ചാണ് മനുഷ്യന്റെ ശരീരം രൂപീകരിക്കപ്പെട്ടത്. ഭൂമിയുമായി താരതമ്യം ചെയ്യുമ്പോൾ നിരവധി വെല്ലുവിളികൾ നിറഞ്ഞ ഒരിടമാണ് ചൊവ്വ. ഭൂമിയുടെ മൂന്നിലൊന്ന് മാത്രമാണ് ചൊവ്വയിലെ ഗുരുത്വാകർഷണം. നേർത്തതും 95% കാർബൺ ഡയോക്‌സൈഡ് അടങ്ങിയതുമാണ് അവിടുത്തെ അന്തരീക്ഷം. ഓക്സിജന്റെ അളവ് തുലോം കുറവാണ്. കൂടാതെ, സൂര്യനിൽ നിന്നുള്ള ഹാനികരമായ അൾട്രാവയലറ്റ്, ഗാമാ വികിരണങ്ങൾ നേർത്ത അന്തരീക്ഷത്തിലൂടെ നേരിട്ട് പതിക്കുകയും ചെയ്യും. ഭൂമിയിലെ ശക്തമായ കാന്തികമണ്ഡലം ഈ വികിരണങ്ങളിൽ നിന്ന് നമ്മെ സംരക്ഷിക്കുമ്പോൾ, ചൊവ്വയ്ക്ക് അത്തരമൊരു സംരക്ഷണം ഇല്ല. ചൊവ്വയിൽ ജീവിക്കുന്നത് അത്ര സുഖകരമായ കാര്യമാകില്ലെന്നു സാരം. അതിനാൽ തന്നെ ചൊവ്വയിലെ ജീവിതം വലിയ മാറ്റങ്ങളാകും മനുഷ്യശരീരത്തിൽ വരുത്തുക. നമ്മളിൽ നിന്നും തീർത്തും വിഭിന്നമായ ബാഹ്യരൂപമായിരിക്കും ചൊവ്വാമനുഷ്യർക്കെന്നും ഗവേഷകർ പറയുന്നു.ചൊവ്വയിൽ വീഴുന്ന കടുത്ത വികിരണങ്ങൾ ഒട്ടേറെ ജനിതകവ്യതിയാനങ്ങൾക്കു വഴിവയ്ക്കും.

ഭൂമിയിലെ സാഹചര്യങ്ങളുമായി പൊരുത്തപ്പെട്ട നമ്മുടെ ശരീരത്തിന് ചൊവ്വയിലെ വ്യത്യസ്തമായ ഗുരുത്വാകർഷണത്തിലും വികിരണത്തിലും അതിജീവിക്കാൻ വലിയ തോതിലുള്ള മാറ്റങ്ങൾ അനിവാര്യമാകും. കുറഞ്ഞ ഗുരുത്വാകർഷണം കാരണം ശരീരത്തിന് പേശികളെയും അസ്ഥികളെയും അധികം ഉപയോഗിക്കേണ്ടി വരില്ല. ഇത് കാലക്രമേണ അസ്ഥികളുടെ സാന്ദ്രത കുറയുന്നതിനും പേശികൾ ദുർബലമാകുന്നതിനും കാരണമാകും. ബഹിരാകാശ യാത്രികരിൽ കണ്ടുവരുന്ന ഈ പ്രതിഭാസം ചൊവ്വയിലെ സ്ഥിര താമസക്കാർക്കും ഉണ്ടാകാൻ സാധ്യതയുണ്ട്.ഭൂമിയിലെ ഗുരുത്വാകർഷണത്തിൽ രക്തം താഴേക്ക് ഒഴുകുന്നത് തടയാൻ ഹൃദയത്തിന് കൂടുതൽ പ്രവർത്തിക്കേണ്ടിവരും. എന്നാൽ ചൊവ്വയിൽ ഈ ബുദ്ധിമുട്ട് കുറയുന്നതിനാൽ ഹൃദയത്തിന്റെ ഘടനയിലും പ്രവർത്തനത്തിലും മാറ്റങ്ങൾ വരാം.ചൊവ്വയിലെ ഉയർന്ന തോതിലുള്ള വികിരണം മനുഷ്യ DNA-യിൽ മാറ്റങ്ങൾ വരുത്തും. ഇത് ജനിതക വ്യതിയാനങ്ങൾക്ക് കാരണമാവുകയും കാലക്രമേണ വികിരണത്തെ പ്രതിരോധിക്കാൻ ശേഷിയുള്ള പ്രത്യേക പിഗ്മെന്റുകൾ ശരീരത്തിൽ രൂപപ്പെടുകയും ചെയ്യാം. ഇത് വ്യത്യസ്തമായ ചർമ്മ നിറങ്ങൾക്ക് കാരണമായേക്കാം.

ചൊവ്വയിലെ സാഹചര്യങ്ങളുമായി പൊരുത്തപ്പെട്ട് ജീവിക്കുന്ന മനുഷ്യർ ഒരു പ്രത്യേക ഉപവർഗ്ഗമോ ഒരു പുതിയ സ്പീഷിസോ ആയി പരിണമിക്കാൻ സാധ്യതയുണ്ടെന്ന ആശയം ശാസ്ത്രജ്ഞർ മുന്നോട്ട് വെക്കുന്നു. ഇങ്ങനെ ചൊവ്വയിൽ രൂപം കൊള്ളുന്ന ഭാവനാത്മകമായ മനുഷ്യവംശത്തിന് അവർ നൽകിയിരിക്കുന്ന ശാസ്ത്രീയ നാമമാണ് “ഹോമോ മാർഷ്യാനസ്”.

യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/EvsyvV3gKrEHNC3r1sci6g